Google faise co desenvolvedor de aplicacións ofimáticas Quickoffice

Numerosos dispositivos móbiles que funcionan cos sistemas operativos Symbian S60, Symbian^3, Android e iOS fan uso das aplicacións de Quickoffice para acceder e editar documentos ofimáticos, e coñecedores deste potencial Google decidiu adquirir tal compañía como un xeito de facerse co seu equipo, para así mellorar as aplicacións de Google.
Dende Google aseguran que van continuar a dar soporte á importante base de usuarios de Quickoffice, aínda que é de agardar que as solucións de Quickoffice vaian camiño da integración cos servizos de Google nos vindeiros meses, o que debería ser positivo tanto para os usuarios actuais como para o futuros.
Aínda que dende Quickoffice confirman a súa compra por parte de Google, ningunha das dúas partes dá detalles nin sobre o montante da operación nin sobre a data na que se fará efectiva.