O CPETIG anima ao sector empresarial a confiar plenamente na enxeñaría técnica en informática

O Colexio Profesional de Enxeñaría Técnica en Informática de Galicia (CPETIG) animou á sociedade e o tecido empresarial da nosa terra, este sábado pasado (16 de xuño), a confiar nas/nos profesionais que representa para contribuír con innovación e coñecemento ao remate definitivo da crise. A mensaxe foi lanzada no marco do acto de despedida da XVI Promoción de Enxeñaría Técnica en Informática de Sistemas, da XIV Promoción de Enxeñaría Informática e da XVI Promoción da Enxeñaría Técnica en Informática de Xestión.
A cita celebrouse na Facultade da Informática da Coruña, e nela xuntáronse, amais dos membros do CPETIG, un nutrido grupo de ex alumnos e ex alumnas.
En representación do CPETIG, asistiu o presidente do colexio, Marcos Mata. Por parte da Universidade da Coruña participou o decano da Facultade de Informática, Alberto Valderruten e vicerreitor de Títulos, Calidade e Novas Tecnoloxías, Julio Abalde Alonso. Durante o seu discurso, Mata expuxo que malia o momento de incerteza que está a vivir a situación económica actual, “as empresas seguen pensando que os enxeñeiros técnicos en informática somos uns dos colectivos que mellor está a soportar a crise e no que segue habendo demanda de traballadores” .
No cóctel posterior ao evento o presidente do CPETIG debateu de xeito animado cos participantes sobre a actualidade da titulación e da profesión.