Ozona amosará a súa experiencia en proxectos ITIL e ISO 20.000 en México

A compañía galega Ozona Consulting, especializada en proxectos de consultoría de procesos ITIL e ISO 20.000, participará o vindeiro día 27 no evento TIL: experiencias en la industria y estándares en el Gobierno… ¿quién dijo que no se puede?, sesión organizada polo itSMF LIG MX no Teatro Moisés Calleja de México DF. Será o director de Ozona, Diego Berea, quen se encargue de participar neste evento, como xa fixo durante o ano pasado en Monterrey e na Cidade de México, o que podemos considerar como un recoñecemento á traxectoria empresarial de Ozona ao presentar a súa experiencia a nivel internacional.

O encontro dará a coñecer aos xestores de procesos, líderes de proxectos, áreas de goberno TI, etc., cales son as leccións aprendidas sobre implementacións no sector da industria e como as áreas de Tecnoloxía da información do sector de Goberno en México instauraron MAAGTIC-SI, como marco de xestión de procesos para garantir unha xestión efectiva e eficiente da área de TI. O Goberno Federal Mexicano publicou no Diario Oficial da Federación do 29 de novembro de 2011 o seu Manual Administrativo de Aplicación Xeral en TIC e na Seguridade da Información (MAAGTICSI), o cal establece unha política para o aseguramento da información gobernamental, que deberán aplicar, obrigatoriamente, todas as dependencias da Administración Pública Federal.
Ozona compartirá cos asistentes unha análise sobre 10 proxectos desenvolvidos en compañías españolas e portuguesas como grandes corporacións do sector industria, administración pública e PEME. Así mesmo, mostrarase a integración da norma ISO/IEC 20000:2011 con outros estándares e o seu aliñamento coas boas prácticas de ITIL.