RELISCO e unha boa representación dos nosos expertos TIC avaliarán este luns o potencial da opinión en liña

A Rede Galega de Recursos Lingüísticos para unha Sociedade do Coñecemento (RELISCO) vai abrir a semana vindeira cunha convocatoria á reflexión sobre un dos grandes piares da Rede presente e futura: a valoración de cada quen. RELISCO, unha iniciativa coordinada pola profesora Margarita Alonso, da Universidade da Coruña, emprazará a devandita actividade de reflexión e divulgación (Xornada sobre Minería de Opinións) na Facultade de Filoloxía de Santiago, este luns 9 de xullo. O contido do encontro será, como dixemos, un estudo das repercusións e do potencial (informativo, comercial, empresarial, social) que teñen as valoracións dos internautas sobre cada cousa (novas, produtos, iniciativas políticas, servizos) que acubilla a Rede.
O ámbito de investigación da minería de opinións, sinala a Universidade da Coruña, é un eido que avalía o tipo de valoracións que predominan nun texto específico. Este ámbito de traballo xera cada vez máis interese, en parte porque o seu estudo achega bases de coñecemento útiles para as empresas (que buscarán adaptarse no posible aos devezos e arelas dos seus clientes) e para toda aquela persoa ou entidade que desexe facer estudos previos de audiencia ou mercado. A xornada, que comezará a partir das 10.00 horas, contará coa participación de Xosé Ramón Pichel, de Imaxin, que falará sobre COATI, o prototipo de reputación en liña multilingüe para blogs para os idiomas galego/portugués e español. Tamén participarán na sesión de mañá Enrique Torrejón, de Bitext, que avaliará NaturalOpinions e incidirá na análise de opinión en Twitter, e Francisco Rangel, de Autoritas, para analizar os Retos da Escoita Activa, máis alá da análise do sentimento. Na xeira de tarde, Judith Sastre, de Inbenta, ofrecerá unha conferencia titulada Por unha xestión semántica das redes sociais; Ivan Pino, de Llorente & Cuenca, falará sobre Monitorización, Reputación e Redes, e Diego Cobelo, de Classora, debullará o significado da Web semántica e bases de coñecemento: recursos para mellorar a análise de contidos.