Telefónica e Visa impulsarán conxuntamente o comercio a través do móbil

Telefónica e Visa Europa anunciaron este venres 6 de xullo un acordo de colaboración con validez para os países europeos nos que ten actividade a operadora e que vai consistir en impulsar novas oportunidades de negocio a través dunha ligazón de conceptos que se prevé frutífera: a do comercio a través do teléfono móbil. Con este achegamento, as compañías establecen un marco para traballar conxuntamente no desenvolvemento de produtos e servizos como a carteira móbil, o pago sen contacto (NFC), servizos para puntos de venda móbil e promocións de establecementos comerciais.
Segundo fixo saber a operadora española no transcurso da sinatura do acordo, o comercio móbil é un nicho clave para Telefónica Dixital, nova división da empresa creada para xerar novas oportunidades de mercado TIC e que nestes intres, nun plano máis concreto, está a pór en marcha o devandito servizo de carteira móbil en Reino Unido, servizo que se vai estender en breve ao outros países. “A relación con Visa Europa”, engadiu a operadora, “facilitará o constante desenvolvemento destes servizos e, ao mesmo tempo, axudará a identificar e xerar novas oportunidades de negocio en áreas como ofertas de establecementos comerciais, puntos de venda móbil e pagos sen contacto (NFC)”. O acordo, asemade, vai permitirlle a Telefónica a oportunidade de acceder á experiencia da rede de empresas asociadas a Visa.