Office 2011 para Mac permitirá gardar ficheiros en SkyDrive

Ante a presentación do Office 2013 efectuada por Microsoft esta mesma semana xurdiu a dúbida de se a nova suite ofimática chegaría tamén a equipos con Mac OS X ou adiaríase un ano como vén a ser tradición (lembremos que mentres para Windows temos Office 2010, en Mac está o Office 2011), e a compañía de Redmond confirmou que a súa intención é que xunto co lanzamento do Office 2013 para Windows 7/8 actualicen o Office 2011 para Mac incorporando soporte de almacenamento na nube baseado en SkyDrive.
Polo momento non se anunciou cal será a vindeira versión de Office para Mac, pero parece bastante razoable pensar que a liña que tomou Office 2013 non é a máis atinada para seguir dende equipos de Apple, nos que non hai previsión de incorporar pantallas táctiles, aínda que non podemos esquecer o rumor de que Microsoft podería estar a preparar unha versión do seu Office para iPad, de xeito que nos vindeiros meses poderíamos levar máis dunha sorpresa ao respecto.