A EGAP colaborará coa Deputación de Ourense

A directora da Escola Galega de Administración Pública, Sonia Rodríguez-Campos, e o presidente da Deputación de Ourense, José Manuel Baltar asinaron esta mañá un convenio de colaboración que ten como obxecto a participación nas actividades da Escola do persoal dependente da Deputación Provincial e das entidades locais da provincia de Ourense, que se suman así aos case 50.000 empregados públicos aos que está a dar servizo a Escola Galega de Administración Pública.
A directora da Escola, Sonia Rodriguez-Campos destacou que a EGAP como institución formativa pon a disposición da Deputación Provincial de Ourense a súa plataforma propia de teleformación, para realizar os cursos nesta modalidade, que dende o ano 2009 ofreceu máis de 25.000 prazas.
Rodríguez-Campos destacou que a teleformación converteuse nunha peza fundamental da xestión da formación da EGAP, chegando a supor o 60 por cento de todas as actividades, e este feito non incide só nunha maior eficiencia no uso dos recursos, senón que tamén ten un valor engadido fundamental ao facilitar a conciliación da vida familiar e laboral e ao permitir realizar cursos a todas aquelas persoas con dificultades de acceso á formación presencial.