Android supera os 500 millóns de dispositivos activados

No día no que Apple vai anunciar o seu iPhone 5 o director de produto de Android, Hugo Bara, sorpréndenos ao anunciar que o sistema operativo móbil Android vén de superar os 500 millóns de dispositivos activados en todo o mundo, de xeito que cada día se superarán os 1,3 millóns de activacións. En xuño falábase de 400 millóns de dispositivos activados e de 1 millón de novos dispositivos cada día, polo que o ritmo de adopción de Android aínda non rematou de medrar, o que é unha boa nova para Google e ás compañías que están a apoiar esta plataforma.
Como curiosidade, Bara tamén informou de que a estatua que representa ao Android 4.1 Jelly Bean no Campus de Google xa está de volta despois de certas reparacións que tiveron que facerlle despois da estrea da última versión do sistema operativo móbil promovido pola compañía de Mountain View.
Actualmente a versión de Android máis empregada é a 2.3, pero nos últimos meses o Android 4.0 comezou a medrar, converténdose practicamente na única opción aceptable para tablets e para móbiles de alta gama, aínda que á súa versión mellorada, a 4.1, estalle a custar un pouco arrincar, pese a incluír grandes melloras de rendemento.