Fortes críticas ao mal funcionamento da aplicación de mapas de iOS 6

Dende onte é posible actualizar os dispositivos móbiles de Apple a iOS 6, o que nalgúns casos supuña poder gozar de Siri en español, pero que como contraprestación tamén perdía un par de aplicacións: YouTube e Google Maps. Os mapas de Google eran substituídos por unha nova aplicación de Apple, que claramente non dá a talla, pero que inclúe navegación GPS de balde, o que non parece compensar aos usuarios, que están a encher a Rede de comentarios sobre as malas representacións gráficas, o ineficiente funcionamento das buscas e a imprecisión á hora de localizar puntos no mapa, dando incluso pé a un Tumblr titulado The Amazing iOS 6 Maps que está a ter un éxito notable polas curiosidades nos mapas de Apple, que chegan a un nivel cómico.
Entre os fallos da nova aplicación de mapas está a ausencia de numerosas vilas de todo o mundo, o incorrecto posicionamento de numerosas localidades, un criterio para priorizar os resultados de busca difícil de xustificar… e iso sen mencionar que carece do acceso ao inmenso volume de datos cos que contaba Google e do servizo Street View (moi útil á hora de localizar un destino dunha vila que non coñecemos).

Tal é a desfeita que un voceiro de TomTom rexeitou que a súa compañía estea detrás destes problemas, pois só son un dos provedores de datos para Apple, e a propia aplicación de mapas de TomTom para iPhone parece confirmar que si saben facer ben as cousas.
A experiencia de uso entre a nova aplicación e a anterior é notable, como amosan nun vídeo en Gizmodo, de xeito que a ferramenta de Apple non só ten peores datos, senón que tamén é máis lenta e ten unha peor usabilidade, de aí que xa hai moitos usuarios esperando a que, ao igual que aconteceu coa aplicación de YouTube, nos vindeiros días chegue á App Store unha aplicación de Google Maps (que coméntase que xa foi remitida á App Store para a súa aprobación). De non ser así, Apple estaría a cometer un erro comparable ao Antennagate, que afectaría seriamente á súa reputación, pois aínda que resulta evidente que mudou a aplicación de mapas para desligarse o máximo posible de Google (por ser Android o seu principal competidor no ámbito móbil), dende a compañía de Cupertino non paran de anunciar as bondades da nova ferramenta (pese a que durante a súa fase de probas xa foi moi criticada, resultando notables as súas carencias).