MOO quere integrar chips NFC nas súas tarxetas de visita

A empresa de servizos de impresión MOO, especializada na creación de tarxetas de visita de distintos formatos e outros produtos semellantes (tarxetas de felicitación, adhesivos e postais) continúa na súa senda de innovación e anuncia que está a preparar unha tarxetas de visita que non só están impresas por ambas caras, senón que tamén aproveitan o seu interior para achegar máis información por integrar un pequeno microchip NFC, de xeito que ao tocar a tarxeta cun móbil que conte con esta tecnoloxía poderíanse disparar procesos no móbil como cargar unha páxina web, reproducir música ou vídeo, descargar o portafolios de traballo do propietario da tarxeta (completando así a información que figura na mesma) e moitas outras funcións que iremos vendo cando estas orixinais tarxetas cheguen ao mercado.

Entre as vantaxes das tarxetas NFC estaría a posibilidade de actualización (a información nas tarxetas NFC pode reescribirse cantas veces se queira), facilitar o compartir contidos multimedia, achegar información de localización (situando o noso negocio no mapa, xunto con información adicional como o horario ou calquera outro detalle que consideremos importante) e, principalmente, transferir os datos da tarxeta de visita á axenda de contactos do móbil dun xeito áxil e doado (algo que actualmente pode facerse con códigos QR, pero que coa tecnoloxía NFC gaña en potencial).

Vídeo de presentación das tarxetas de visita con NFC propostas por MOO