O Foro UNIREDE e Kiko Novoa pasarán polos micrófonos de Banda Ancha este sábado

Este sábado ás 15:00 horas a Radio Galega emite unha nova entrega do programa Banda Ancha, dirixido por Xosé María Fernández Pazos, co que Código Cero leva colaborando máis de 3 anos, e do que queremos dar conta dos seus contidos. Este espazo que a emisora pública do país reserva ao sector TIC fará un repaso ás novas tecnolóxicas da semana, dará voz a Fidel Martín Rocha para dar conta da celebración do Foro UNIREDE o vindeiro día 27 e convida a Pablo Insua, da popular páxina web sobre videoxogos Hardgame2.com para falar dos últimos lanzamentos do lecer electrónico.
Para completar o programa tamén contarase coa presenza de Kiko Novoa, director do programa de radio Galicia por Diante, quen compartirá coa audiencia as súas primeiras experiencias coa informática e a Internet, así coma o uso que fai das plataformas de redes sociais.
Banda Ancha pode seguirse a través das ondas da Radio Galega, mediante o servizo de streaming en directo da emisora ou a través de podcast e do servizo á carta da Radio Galega.