A USC impulsa nove proxectos tecnolóxicos para engraxar a maquinaria galega da transferencia

A Universidade de Santiago quere seguir botando abaixo as barreiras que impiden a óptima transferencia de coñecemento. É dicir: derrubar os atrancos existentes entre a investigación universitaria e o tecido empresarial e a sociedade. Neste senso, a USC incorporou no seu proxecto de Campus de Excelencia Internacional, Campus Vida, o programa Acelerador de Transferencia, dirixido a avanzar na demostración do potencial comercial dos seus resultados de investigación que poidan resultar de interese para a empresa. A iniciativa vai pola súa primeira edición e ponse en marcha identificando 25 proxectos potencialmente transferibles. Deles, logo dun peneirado por parte dos responsables do programa e do seu comité de avaliación, ficaron nove aspirantes a financiamento.
Estes proxectos teñen o común denominador da innovación ou da investigación en novos materiais biotecnolóxicos e novas tecnoloxías da información en diferentes eidos (este último, o ámbito temático que nos ocupa). Un exemplo deste eidos a tratar é o da saúde, que é onde se insire a plataforma Servando, un sistema de monitorización docimiciliaria de pacientes empregando teléfonos móbiles intelixentes que dirixe o doutor Paulo Félix. No proxecto, informa a USC, “tratarase de validar o uso desta plataforma para levar a cabo a monitorización na casa de doentes con insuficiencia cardíaca e demostrar que o seu uso reduce tanto o número de hospitalizacións como a estancia media no hospital deste tipo de pacientes”. Nesta liña tamén se incluíu un proxecto coordinado polo doutor Justo Arines, a través do cal validarase nun entorno hospitalario a capacidade de mellorar imaxes médicas mediante a aplicación da técnica de procesamento de imaxe Wavefront coding e permitir aumentar as posibilidades dun diagnóstico temperá.