O CPEIG apoia a candidatura da Coruña como Cidade da Ciencia

O Colexio Profesional de Enxeñaría en Informática de Galicia (CPEIG) tomou recentemente a decisión de apoiar a candidatura do Concello da Coruña como Cidade da Ciencia e da Innovación, recoñecemento que vai conceder o Goberno central e que se dirixe a salientar o labor dos gobernos locais a prol da difusión da investigación, da investigación en si mesma e de todo o que teña que ver coa consecución de espazos urbanos conectados, innovadores e envorcados na produción de ciencia. Ao fío disto último, lembrar que o CPEIG distinguiu, no marco da súa gala anual en Santiago, ao Concello da Coruña co Premio Iniciativa da Administración polo seu Proxecto Smart City, do que achegamos cumprida información en Código Cero a través dunha entrevista co tenente de Alcalde, Martín Fernández Prado.
Sinalar que o premio ao que aspira agora A Coruña vén da man da Secretaría Xeral de Ciencia e Tecnoloxía, departamento da Administración central que aprobou con resolución do 5 de novembro de 2012 a convocatoria para a concesión da distinción Cidade da Ciencia correspondente a 2012, resolución que se dirixe, en termos xerais, a destacar proxectos directamente relacionados co pulo á ciencia, a innovación, o I+D e a divulgación científica.
A convocatoria do premio Cidade da Ciencia e a Innovación contará este ano coa candidatura da Coruña, impulsada polo propio Concello coa finalidade de que se recoñeza o labor desenvolvido no municipio a prol do devandito esforzo de difusión.
O Goberno local está a solicitar o apoio das organizacións e colectivos locais á candidatura municipal a este certame, formalizado en 2010 polo Ministerio de Ciencia e Innovación para distinguir os méritos das cidades que lideran os procesos de avance científico.