TELGalicia define o seu plan de traballo para o vindeiro semestre

O campus de Vigo acolleu hoxe unha xuntanza dos integrantes da rede galega sobre e-learning TELGalicia, á que tamén asistiu o profesor da Universidade Complutense de Madrid, Javier Torrente Vigil, un dos autores da plataforma de creación de xogos educativos eAdventure, que permite desenvolver aventuras gráficas, que pode empregarse tanto para que os profesores xeren xogos para utilizar nas aulas como para animar a que sexan os propios alumnos, axudados polos docentes, os que poidan elaborar os seus propios xogos, tal e como comentou Torrente.
Dende TELGalicia teñen en conta que ferramentas como os vídeos, os xogos ou as aplicacións para facer robots poden ter un lugar de seu nas aulas de Primaria e Secundaria, levando a innovación á aprendizaxe, involucrando máis aos alumnos na aula e mudando o rol do profesor, que pasa de ser o centro para actuar como “conselleiro e recomendador” segundo comentou o coordinador desta rede, Manuel Caeiro.
A xuntanza desta xornada serviu para presentar o plan de traballo de TELGalicia para o vindeiro semestre, un programa de actuacións que procurará a elaboración de propostas educativas para o desenvolvemento na aula, a creación dun repositorio de materiais e recursos educativos (principalmente ferramentas informáticas dispoñibles na web), desenvolver un marco competencial para profesores sobre TIC aplicadas á educación e realizar enquisas sobre o emprego das TIC na educación primaria e secundaria en Galicia.