A Coruña terá presenza no comité para regular e espallar no eido estatal as Cidades Intelixentes

A semana pasada o Ministerio de Industria (a través da Secretaría de Estado de Telecomunicacións e para a Sociedade da Información) e máis a Asociación Española de Normalización e Certificación (AENOR) subscribiron un acordo para colaborar, xuntas, no desenvolvemento de actividades que contribúan a normalizar, no eido estatal, o crecemento e constitución das Cidades Intelixentes. Este acordo, asinado por Víctor Calvo-Sotelo (secretario de Estado) e Avelino Brito (AENOR), inclúe a posta en marcha dun Comité que vele polo proceso de regulación e que coordine a elaboración de normas e documentos que atendan ás demandas da industria e das administracións en materia de Smart Cities e consolidación das mesmas. Pois ben, o Comité en cuestión contará coa presenza do Concello da Coruña, que lidera, como lembraremos, o seu propio proxecto de cidade conectada.
O convenio, segundo sinala o Cluster TIC de Galicia dende a súa web, abrangue tamén o obxectivo de fomentar a normalización no eido das Cidades Intelixentes para contribuír, deste xeito, á súa implantación e despregamento en España. O acordo permitirá a normalización dun novo modelo de desenvolvemento urbano que posibilite xestionar de forma sostible e intelixente as cidades.
O Comité Español de Normas sobre Cidades Intelixentes, integrado por máis de 170 representantes de empresas, administracións públicas e especialistas en novas telecomunicacións e redes da información, establecerá os criterios e parámetros que terán que rexer as Smart City.
A Coruña tamén foi elixida voceira do Comité Plenario, encargada do seguimento e coordinación das cidades intelixentes e da relación con outros comités internacionais.