Mega ten unha estrea accidentada por mor da masiva afluencia de usuarios

O sábado pola tarde veu a luz definitivamente Mega, o servizo chamado a suceder a Megaupload aproveitando o cabodano do seu peche, e para presentalo en sociedade Kim Dotcom organizou todo un espectáculo en Nova Zelandia, facendo burla da redada na súa mansión e servindo para dar a coñecer máis detalles do novo servizo e os seus plans de futuro. Pero esta posta en escena non foi acompañada por un lanzamento axeitado, xa que a vaga de usuarios que querían probar o novo Mega era tal que o sistema non foi capaz de funcionar ben durante toda a fin de semana, con problemas para rexistrar novos usuarios e subir e descargar ficheiros.
Kim Dotcom asegurou que na primeira hora Mega sumou 100.000 usuarios rexistrados (o que podería ser todo un record para unha startup) e superou os 250.000 rexistros só unha hora despois, saturando totalmente os servidores de Mega, non publicándose máis datos a partir dese momento (estímase que puido superar o millón en 24 horas) e prometendo Dotcom que prepararían os sistemas para poder atender á impresionante carga á que se viron sometidos.

Para saber se Mega é realmente o prometido haberá que agardar varios días, pero o que xa sabemos é que é só o primeiro paso, pois agora chegarán Megakey, a plataforma de publicidade que manterá economicamente os proxectos de Dotcom, e Megamovie, un servizo de vídeo en liña que podería chegar a ser a competencia de Netflix.
Polo momento o que está claro é que Mega só está a ofrecer un servizo de almacenamento na nube semellante a Dropbox, que aínda non está plenamente operativo, pero que grazas ao ruído provocado por Megaupload goza da mellor campaña publicitaria posible, pois os medios de todo o mundo están a falar do proxecto de balde, pulo que de aproveitarse podería servir para superar a todos os seus competidores e establecerse como base para outras iniciativas na mesma liña, que desta volta están deseñadas para evitar problemas legais, o que en boa medida supón a desprotección dos usuarios, xa que as medidas de seguridade de Mega non están aí para garantir o anonimato dos usuarios, senón para protexer á compañía de accións legais ao deixar toda a responsabilidade do uso do servizo nos usuarios.