O Instituto Galego de Estatística e o Colexio de Arquitectos intercambiarán tecnoloxía para optimizar os seus servizos

O Instituto Galego de Estatística (IGE) e o Colexio Oficial de Arquitectos de Galicia asinaron os días pasados un convenio para unir forzas no camiño de mellorar e simplificar os trámites para a cidadanía, os profesionais do sector e as administracións. Máis polo miúdo, o acordo diríxese a formalizar as canles precisas para intercambiar información e tecnoloxía co obxectivo “de optimizar información estatística sobre a edificación e a construción en Galicia, evitar duplicidades e xerar información para a elaboración da evolución anual das magnitudes macroeconómicas”. No acto de formalización do acordo participaron o director xeral do IGE, José Antonio Campo Andión, e o decano do Colexio de Arquitectos, Jorge Duarte Vázquez.
Este proxecto de interoperabilidade entre os dous organismos, informaron, “nutre de información as bases de datos do IGE, permite o intercambio de información; facilita a obtención automática de datos estatísticos e simplifica os trámites para os cidadáns, os profesionais e as diferentes administracións sen ningún tipo de custe para o Instituto”. No marco deste convenio e meténdonos nun plano máis concreto, dicir que o Instituto Galego de Estatística e o Colexio Oficial de Arquitectos de Galicia colaborarán na edición e publicación da información estatística da actividade de edificación e urbanismo nas distintas divisións territoriais de Galicia, é dicir, por provincias, comarcas e concellos.
O IGE incorpórase ao proxecto desenvolvido pola Axencia de Modernización Tecnolóxica de Galicia –dependente da Xunta de Galicia- e o Colexio de Arquitectos sobre a tramitación telemática das licencias urbanísticas na Comunidade, “unha iniciativa enmarcada na estratexia tecnolóxica do Executivo galego para o desenvolvemento da Administración Electrónica na comunidade autónoma e que permitirá, tamén, avanzar na sistematización e automatización da enquisa Estatística de construción de edificios”.