Huawei pechou 2012 como o terceiro fabricante mundial de smartphones

Dende Gartner están a facer balance das vendas de móbiles durante 2012, sorprendendo o resultado de que experimentouse unha caída do 1,7% nas vendas, cun total de 1.750 millóns de unidades, cunha presenza cada vez maior dos smartphones, que no último trimestre do ano rexistraron un incremento interanual das súas vendas do 38,3% chegando aos 207,7 millóns de unidades. No mesmo período tamén destaca o feito de que entre Apple e Samsung acaparen o 52% dos smartphones, rematando o ano con Samsung como líder, algo que parecería difícil de crer hai un par de anos.
Agora a guerra parece estar por conquistar o posto de terceiro fabricante mundial de smartphones, logro que foi parar a Huawei, compañía chinesa que ata hai pouco tiña sona de dedicarse á fabricar dispositivos de marca branca ou de baixa gama, pero que con móbiles como os Huawei Ascend D2 e Mate conseguiu labrarse unha boa reputación, chegando a vender 27,2 millóns de smartphones en 2012 (un 73,8% máis que en 2011).
Que Samsung está a tomar cada vez un maior pulo resulta evidente, pero tamén é destacable o que está a acontecer con Apple, que pese a manter un bo ritmo, está a desprazar as súas vendas cara aos seus dispositivos máis económicos, de xeito que o iPhone 4 e 4S están a ter mellor saúde que o iPhone 5, á vez que a chegada do iPad mini podería ter prexudicado ás vendas, por ampliar o abano de elección do consumidor, que tiña que elixir se actualizar o seu iPhone ou facerse cun iPad de menores dimensións.
Se analizamos as vendas mundiais por sistemas operativo móbiles durante o último trimestre de 2012 temos que Android conseguiu acaparar o 69,7% das vendas, iOS quedou co 20,9%, BlackBerry co 3,5 e Microsoft co 3%, mentres que o resto de plataformas quedaron cunhas cantidades residuais que continúan o seu ciclo descendente, deixando un espazo polo que en 2013/14 pugnarán Ubuntu Phone OS, Firefox OS e Tizen, entre outros.