Internet como arma de venda será a temática dun novo seminario no Centro Demostrador TIC

É sabido por todos que as redes sociais son unha canle ben axeitada á hora de vender. Deste xeito, tanto autónomos coma microempresas ollan cada vez máis cara a esta opción pensando sempre nunha mellora do seu negocio. Atendendo á forte demanda de como incrementar as vendas na Rede, os días 21 e 22 de febreiro (de 10 a 19 horas) impartirase no Centro Demostrador TIC -dependente da Axencia para a Modernización de Galicia (AMTEGA)– o obradoiro de formación Presenza en internet e redes sociais: Como usar internet para aumentar vendas, que será impartido polo consultor especialista en publicidade-promoción en liña, comercio electrónico e presenza en redes sociais, Javier Rocamora.
Así, na primeira sesión Rocamora exporá como pór en marcha unha tenda dixital e emprazala nos principais buscadores. A segunda xornada estará encamiñada ao mundo das redes sociais como ferramenta de marketing, á reputación online, ás redes móbiles, á xeolocalización, etc.
Neste seminario -froito do traballo conxunto entre o CDTIC e a Rede CeMIT– haberá tamén lugar para novidades como a posibilidade de seguimento a través de videoconferencia. Dicir que se poderá seguir e interactuar cos relatores e participantes mediante o uso en Twitter do hashtag (ou etiqueta) #presenzanaweb ou mandando unha mensaxe a través do Facebook da iMit.
Cómpre sinalar que as aulas CeMIT que impartirán este seminarios serán dez: Betanzos, Fisterra, Oroso, Ortigueira, Sarria, Allariz, Celanova, A Cañiza, Marín e Pontevedra.
Por último informar que a asistencia a todas as actividades é de balde, condicionada aos aforos dos locais. Emporiso, para asistir ao seminario nas instalacións do Centro Demostrador TIC en Santiago de Compostela, haberá que inscribirse en liña a través da web do centro. No entanto, os que queiran asistir vía videoconferencia nas aulas CeMIT, a inscrición será a través da conta formacion-cemit@xunta.es.