O Día do Consumidor pon de manifesto a suba importante de queixas relacionadas coas telecomunicacións

Este venres 15 de marzo celébrase unha xornada que nos toca de cheo, seareiros, informadores, produtores, investigadores ou destinatarios de tecnoloxías como somos, en maior ou menor medida compradores. Estamos a falar do Día Mundial dos Dereitos do Consumidores, unha xornada que en España vén da man (en boa medida) de ASGECO Confederación e que, unha vez máis, non deixa en bo moi lugar (dende o punto de vista da satisfacción xeral dos usuarios de redes) ao sector das telecomunicacións (telefonía móbil e Internet). Este eido, xunto con transportes, gas e electricidade, liderou as reclamacións achegadas á confederación estatal durante o ano pasado. En total, unido tódolos sectores, estamos a falar de case 120.000 reclamacións e consultas. Os ámbitos de transportes e redes abranguen case dous terzos do total.
E a cousa semella ir a máis no que telecomunicacións se refire. Os motivos, os de sempre: principalmente calotes disfrazados de xestión de promoción que fan que a xente se sinta enganada, ofertas e servizos que logo non se dan. Ou ben, chamadas telefónicas con gravación incluída que, polo baixo, formalizan contratados non desexados e mesmo descoñecidos para o consumidor. As malas maneiras proliferan nas operadoras, aínda que claro, hai excepcións. Porén, a tendencia é á alza. “Resulta de especial importancia”, engade a entidade de consumidores, “o lixeiro descenso das consultas e reclamacións recibidas no sector dos transportes, o 20,86%, un 3% menos có ano anterior, o aumento vertixinoso das reclamacións recibidas en telecomunicacións, cunha taxa do 36,79% e cun medre interanual do 15%, especialmente en telefonía móbil”. Lembrar que para resolver dúbidas e asesorar aos usuarios, ASGECO mantén en marcha na súa web a campaña Non clames, reclama, que achega ferramentas de información para pór en marcha unha queixa.