Google estrea en España o seu buscador de voos

Google anunciou o lanzamento do seu buscador Flight Search para Reino Unido, Francia, Italia, Países Baixos e España, o que facilita a busca de voos tanto estatais como internacionais, xunto co seu prezo, facilitando a busca, comparación e reserva de cara ás nosas viaxes, destacando o servizo por chegar en 8 idiomas entre os que non faltan o español, o éuscaro, o catalán e o galego.
Flight Search permite atopar voos de xeito rápido, reflectindo os resultados cada vez que mudamos unha das condicións de busca (datas, destinos, filtros…), deixa explorar lugares aos que ir a través dun mapa (onde figurarán destinos que se axusten ás condicións que marquemos), fai doado atopar as mellores datas para realizar as nosas viaxes ao mellor prezo posible e preséntase dun xeito moi doado de comprender, aínda que por desgraza non ofrece os resultados de todas as aeroliñas, con ausencias tan sonadas como Lufthansa, Ryanair e Easyjet, o que fai que esta ferramenta perda boa parte da súa utilidade, o que resulta especialmente grave se temos en conta que este servizo chega a Europa 18 meses máis tarde que aos EE.UU., tempo no que poderían ter superado os atrancos que permitan que Google poida competir con outros comparadores de voos existentes.