Destinan 4,5 millóns de euros aos centros tecnolóxicos e de investigación galegos

Tras o Consello da Xunta celebrado esta mañá o presidente Alberto Núñez Feijoo avanzou que o Goberno galego porá en marcha, por primeira vez, unha liña de axudas destinadas a financiar contratos-programa estables nos centros tecnolóxicos e de investigación galegos, realizando o Executivo galego un investimento de 4,5 millóns de euros anuais para lograr a atracción e retención de talento e para os equipamentos e subcontratacións dos ditos centros.

Esta iniciativa está enmarcada no convenio da Estratexia Española de Innovación E2I e permitirán que os cinco centros tecnolóxicos galegos (AIMEN, Gradiant, ANFACO-CECOPESCA, CETAG e ITG), “que contan cun recoñecemento de excelencia a nivel estatal”, poidan beneficiarse desta iniciativa, recibindo 2,3 millóns de euros ao ano para o seu mantemento ata 2015. Os 2,2 millóns de euros restantes repartiranse entre o resto de centros de coñecemento galegos como a Plataforma de Innovación Sanitaria do Servizo Galego de Saúde e os centros situados en Galicia do CSIC ou do Instituto Español de Oceanografía.
Núñez Feijoo aproveitou a ocasión para destacar que a Xunta inxectará 10 millóns de euros para promover a internacionalización das empresas galegas a través dos programas Foexga e re-Export.