Klaus Multiparking amosa na Coruña ante un cento de profesionais os seus aparcadoiros intelixentes e anti-contaminación

Finalmente celebráronse na Coruña as xornadas da multinacional Klaus Multiparking para amosar os seus máis recentes achados tecnolóxicos en aproveitamento de espazo urbano para o aparcamento de vehículos, un espazo que, case sen excepción, faise máis reducido nas nosas vilas e cidades por mor dos procesos de humanización que desenvolven os gobernos locais (moi positivos en xeral, sempre e cando non redunden en máis contaminación derivada dos atoamentos e das voltas dos condutores buscando onde aparcar). A xuízo de Klaus Multiparking, os sistemas robotizados que aproveitan o espazo dispoñible dun xeito máis eficaz, “son unha alternativa efectiva ao garaxe convencional”. A firma xermana celebrou na Coruña dúas xornadas no Colexio Oficial de Enxeñeiros de Galicia.
Nestas xuntanzas, Arno Hoyer, director xeral de Klaus Multiparking España e Portugal e Eduardo Sieiro, enxeñeiro industrial, analizaron as vantaxes da instalación dun aparcadoiro robotizado e o aproveitamento de espazo que supoñen estes novos sistemas. O evento contou coa asistencia de medio centenar de enxeñeiros e arquitectos. Segundo explicou Hoyer, “os aparcadoiros Multiparking duplican ou triplican o número de estacionamentos nun garaxe convencional, de doada instalación e cun mantemento moi económico, permiten reducir de xeito considerable as emisións de CO2 e axudan á mellora da mobilidade, dado que de media o 30% do tráfico nas cidades son condutores que buscan estacionamento”. En definitiva, dixo, estamos ante uns sistemas que permiten un aforro de volume e superficie entre o 40 e o 50% comparado con outros aparcadoiros convencionais.
Durante a xornada, os asistentes preguntaron sobre as solucións personalizables deste tipo de aparcadoiros e Hoyer explicou que “grazas á súa variedade de produtos, Multiparking ofrece solucións para cada situación”, engadindo que “cos seus diferentes sistemas (semiautomáticos, robotizados, palés ou plataformas xiratorias), dáse resposta ás necesidades e características de cada usuario, desde unha vivenda unifamiliar ata un estacionamento público”. As xornadas, por certo, acompañáronse da instalación do primeiro aparcadoiro robotizado da dita multinacional na cidade da Coruña.