INEO, COETG e CENTAC celebran este luns o Día das Telecomunicacións cunha xornada sobre Cidades Intelixentes

INEO (a Asociación Multisectorial de Novas Tecnoloxías da Comunicación), o Colexio Oficial de Enxeñeiros de Telecomunicación de Galicia (COETG) e o Centro Nacional de Tecnoloxía da Accesibilidade (CENTAC) coorganizan este luns día 20, en Santiago, o Foro Cidades Intelixentes: Un compromiso coa accesibilidade. A cita, que conmemora o Día Mundial das Telecomunicacións e a Sociedade da Información 2013 (este 17 de maio, tamén Día da Internet e Día das Letras Galegas), estará presidida polo conselleiro de Economía e Industria, Francisco Conde e desenvolverase a partir das 12.00 horas no Centro de Novas Tecnoloxías de Galicia de Santiago. Na celebración tamén participarán o presidente e a directora xeral de INEO, Jorge Cebreiros e Lucía Gregorio, respectivamente.
O gran obxectivo da xornada, amais de festexar o Día das Telecomunicacións, é explicar as claves da correcta accesibilidade nas futuras Cidades Intelixentes (Smart Cities), un concepto de novos espazos urbanos conectados, dixitalizados, que abranguen e aglutinan mellores servizos de telecomunicacións, mellores servizos de eAdministracións (menos gasto e máis accesibilidade) e, tamén, a optimización dos servizos municipais máis demandados, como por exemplo mobilidade, tráfico ou atención sanitaria.
Por certo que na xornada do luns tamén confirmou a súa participación Juan Luis Quincoces (director xeral da Fundación Centro Nacional de Tecnoloxía da Accesibilidade), quen falará, arredor das 12.30 horas, dos recursos que se precisan para ter á nosa disposición unha cidade intelixente accesible. Tamén falarán Felicitas Rodríguez (responsable do programa de Voluntariado Dixital da Xunta) e Pablo Bermúdez (director xeral de SCIO Innovation Technologies).