O IGAPE defende a cooperación tecnolóxica para mellorar a competitividade das empresas galegas

Durante unha visita ás instalacións da empresa compostelá de telecomunicacións Televés, o director xeral do IGAPE, Javier Aguilera, avaliou as súas posibilidades de cooperación ou alianza tecnolóxica con compañías doutros sectores, que demanden aplicacións electrónicas para mellorar os seus produtos ou servizos para gañar competitividade.
Aguilera trasladou aos directivos de Televés as demandas recibidas a través de varios clústers de empresas galegas, que teñen detectada a necesidade de incorporar ás súas cadeas de produción compoñentes tecnolóxicos de alto valor engadido. O director do IGAPE destacou que o grupo de telecomunicacións dispón dun potencial de desenvolvemento tecnolóxico que pode supoñer unha vantaxe competitiva para outras empresas galegas, e salientou o carácter global da compañía, con presenza comercial en máis de 80 países.
A través de reunións de traballo cos clústers que agrupan a empresas galegas de sectores estratéxicos, a Consellería de Economía e Industria está a detectar as posibilidades de traballo conxunto no ámbito das TIC entre compañías que desenvolvan a súa actividade en ámbitos diferentes.