Auditores avalían a aplicación dos sistemas de calidade en Enxeñería de Telecomunicación e Bioloxía (UVigo)

As Facultades de Bioloxía e de Enxeñaría de Telecomunicacións da Universidade de Vigo están a reforzar aínda máis o seu papel referencial a nivel educativo europeo. Cóntanolo hoxe a UVigo, informando dos traballos que están a facer os responsables de ámbolos centros para superar o proceso de avaliación da implantación dos seus sistemas de calidade, proceso en activo estes días coa visita dos auditores encargados de avaliar a aplicación práctica dos ditos sistemas. “Trátase dunha fase piloto na que participan voluntariamente estes dous centros vigueses, xunto con dous da Universidade da Coruña e un de Santiago”, informa a Uvigo.
O equipo está composto por Laureano González Vega, profesor da Universidade de Cantabria, Marta González Moldes, de Trillium Consultores e Mª Dolores Castro Pais, técnica de ACSUG. Foron recibidos polo reitor, Salustiano Mato, que destacou a implicación destes dous centros e apuntou que “serán os que vaian abrindo camiño ao resto de escolas e facultades que deberán pasar por este proceso no futuro”.
Segundo explica a UVigo, a tarefa de implantación de sistemas de calidade comezou no curso 2009-2010. Nunha primeira fase elaboráronse os protocolos e sistemas de calidade que afectan a todos os eidos do centro, dende a docencia ata a administración, as prácticas pre-profesionais ou a comunicación interna e externa. “Estes sistemas de garantía de calidade”, explica o vicerreitor do Alumnado, Docencia e Calidade, Ignacio Barcia, “están acreditados polo programa Fides-Audit en todos os centros da Universidade de Vigo, pero agora o que toca é a súa aplicación prácticas, comprobar como se están poñendo en marcha”.
Para a directora da Escola de Enxeñaría de Telecomunicación, Edita de Lorenzo, e o decano de Bioloxía, Jesús Míguez, o proceso de implantación dos sistemas de calidade foi “intenso e progresivo e requiriu a colaboración de todos os sectores, dende os docentes e investigadores, o persoal de administración e servizos e o alumnado, así como unha importante coordinación con outros servizos alleos aos centros”. E engaden: “É dificultoso porque é algo novo ao que hai que acostumarse e adaptar uns protocolos que xa veñen determinados ás necesidades e características dos nosos centros”. Ao seu xuízo, os beneficios destes sistemas son claros, sobre todo no eido da comunicación (máis transparencia, máis simplificación nos procesos, máis compromiso coa claridade).