Os procesos de gamificación xuntan aliados na primeira xornada aberta de ANAGAM

A Asociación Nacional de Gamification e Marketing Dixital (ANAGAM) levou a cabo este xoves 18 en Madrid o seu primeiro Open Day. A finalidade básica do evento era subir un novo chanzo no proceso de facer visibles os beneficios da gamificación a nivel estatal, que non é outra cousa que a aplicación dos pensamentos, metodoloxías e mecánicas dos xogos tecnolóxicos a contextos alleos aos mesmos, neste caso o contexto empresarial con tódalas actividades que lle son propias (xestión, promoción, venda, distribución, comunicación, etc). A gamificación, ademais, serve para facer o eido de aplicación máis atractivo, interesante, divertido e creativo (tírase proveito da predisposición psicolóxica das persoas para participar en xogos). Amais de amosar as vantaxes desta metodoloxía de traballo, no devandito Open Day achegáronse prácticas concretas da mesma (innumerables exemplos) perante un público eminentemente empresarial.
Segundo informan os organizadores do evento, esta foi a primeira vez que máis de 20 profesionais puideron coñecer o laboratorio onde se xerou o meirande proxecto de gamification español ata a data, como foi o proxecto BBVA Game. Así, desde a axencia Redbility, berce do proxecto, o seu xefe director executivo Antonio Gutiérrez, amosou na compaña de Bernardo Crespo, responsable do departamento Mercadotecnia Dixital de BBVA, os segredos da devandita experiencia da entidade bancaria, “que serviu de espello para moitos outros casos de éxito” e que consistiu, en palabras de Crespo, “nunha innovadora aproximación de servizo en liña para os clientes españois onde se combinou a educación financeira enriquecida con dinámicas de xogo, sendo o seu propósito ensinar, de xeito divertido, as posibilidades da web corporativa”.
A Asociación Nacional de Gamification e Marketing Dixital está presidida por Juan Carlos Lozano, director executivo de Dir&Ge, ao que acompañan na xunta directiva Pablo de Echanove (xefe de desenvolvemento de negocios en liña de Philips), Bernardo Crespo (responsable do departamento de Marketing Dixital de BBVA), Mercedes Gómez (directora de Mercadotecnia de Sage Pay), Antonio Gutiérrez (director executivo de Redbility), José Luís Ferrero (responsable de eCommerce e Desenvolvemento de Negocio en Philips Ibérica), Sergio Jiménez (fundador de Game Mercadotecnia), José Carlos Cortizo (director executivo de BrainSins) e Arturo Castello (director executivo de Mollo).