Máis da metade das operacións dos clientes de NCG faise a través de banca en liña

NCG Banco fixo reconto estes días do acadado en materia de implicación dixital con respecto ao servizo que achega aos seus usuarios. Así, segundo fai saber a entidade galega nun comunicado, os seus clientes realizan arestora o 53% das operacións a través de canles de banca online (Internet, móbil e teléfono). No último ano, engade, as operacións realizadas fóra da oficina aumentaron un 57%, superando por primeira vez ás que os clientes fan na rede de caixeiros automáticos e nas sucursais da entidade.
Estas cifras, a xuízo da entidade galega, son unha recompensa aos esforzos despregados recentemente a prol da optimización da calidade dos servizos de seu aos clientes. Ao abeiro disto, de feito, púxose en marcha a iniciativa O2 (Optimización Operativa), na que se insire un programa de modernización e simplificación de todo o que se fornece aos usuarios, “potenciando as canles tecnolóxicas para facilitar as xestións aos usuarios e ampliando o horario das oficinas mañá e tarde co obxectivo de ofrecer unha atención máis especializada”, explican os responsables de NCG Banco. E engaden: “Trátase de ir axudando aos clientes a realizar algunhas operacións por si mesmos e coa vantaxe de ofrecerlles canles dispoñibles as 24 horas do día os 365 días do ano. Buscamos ofrecer unha banca de servizo máis directa e personalizada”.