Redúcese a fenda dixital de sexo en Galicia

O estudo temático A Sociedade da Información en Galicia desde unha perspectiva de xénero, publicado hoxe polo Observatorio da Sociedade da Información e a Modernización de Galicia (OSIMGA) e dispoñible para a súa descarga en formato PDF, recolle que a fenda dixital de sexo no uso de Internet en Galicia sitúase en 3,9 puntos fronte aos 5,2 da media estatal, cun 55,5% das mulleres e un 59,4% dos homes facendo usa da Rede nos últimos tres meses, o que supón un incremento de 11 puntos no período 2008-2012 entre as mulleres galegas, que foi o que permitiu este importante avance na redución da fenda de sexo existente no ámbito tecnolóxico.

Cuestión de idade

O estudo do OSIMGA conclúe que a fenda dixital de sexo está fortemente influenciada pola idade: na franxa dos 16 aos 44 anos as mulleres superan aos homes no uso das TIC. A partir dos 45 anos, a tendencia invértese, sendo especialmente desfavorable para as mulleres entre os 65 e os 74 anos.
As novas xeracións rompen a dicotomía tradicional: mulleres/tecnofobia, homes/tecnofilia, mostrando que non existen diferenzas de sexo significativas respecto ás habilidades e aos usos das TIC entre homes e mulleres ata os 45 anos.

Compras na Rede

No que se refire ás compras a través da Rede, un 19,3% de mulleres galegas adquiriu algún ben ou servizo a través de Internet nos últimos tres meses, fronte a un 22,2% dos homes. Neste ámbito Galicia ten unha fenda dixital de sexo de só 2,9 punto (a metade da fenda existente a nivel estatal).
De novo, as mulleres galegas novas de 16 a 34 anos empregan o comercio electrónico en maior medida que os homes. Neste indicador non se observan diferenzas tan significativas entre os homes e mulleres nos tramos de maior idade porque as compras a través de Internet están pouco estendidas a partir dos 55 anos.