A galega Ayco amosará a súa solución de bolígrafo dixital en París, Madrid, Múnic e Milán

Ayco foi seleccionada por Intel para acudir como partner tecnolóxico aos eventos In Touch with the Future que organiza en París (1 de outubro), Madrid (3 de outubro), Múnic (8 de outubro) e Milán (10 de outubro). Durante estes, estará nas áreas de demostración mostrando as novidades da ferramenta de bolígrafo dixital BlackPen para Windows 8 sobre Intel Ultrabook.
Trátase dunha oportunidade única para dar a coñecer a nivel internacional a tecnoloxía desta empresa galega e compartir experiencias con partners de todo o mundo. Durante os eventos poderase escoitar os líderes da industria en mobilidade, redes sociais, colaboración, automatización de forza de vendas, etc., ademais de poder experimentar e probar as últimas tecnoloxías e solucións na área de showcase.

Pola súa banda, Ayco presentará a solución de bolígrafo dixital con demostracións prácticas con dispositivos de Intel. A aplicación de BlackPen permite transmitir todo o que se escribe sobre un papel a un sistema informático en tempo real, replicando o documento manuscrito orixinal e os datos ou accións que se incluísen ao cubrir a folla, simplemente, utilizando elementos tan tradicionais como o bolígrafo e o papel. Non é necesario un papel especial, simplemente hai un proceso previo de deseño do formulario podendo despois imprimilo cunha impresora habitual e utilizar o bolígrafo dixital con tecnoloxía Anoto.
Os usuarios benefícianse da forma natural, simple e intuitiva de usar bolígrafo e papel. É dicir, calquera texto que se poña no papel ou imaxes que achegue, transfórmanse en datos dixitais e, o máis importante, non hai necesidade de cambiar os procesos básicos de recollida de información ou as rutinas de traballo.