Windows Phone consegue o 9,2% das vendas de smartphones nos 5 principais mercados europeos

Kantar World Panel vén de publicar os datos de vendas de smartphones correspondentes a trimestre que remata en agosto, destacando que Windows Phone conseguiu rexistrar a súa meirande cota de venda nos cinco primeiros mercados europeos (Reino Unido, Alemaña, Francia, Italia e España), cun 9,2%, o que supón a súa consolidación nun terceiro posto e incluso estaría a facer as beiras ao segundo posto en Alemaña, onde a distancia que separa ao sistema operativo de Microsoft co de Apple é de só un 0,7%.
Destacan que en Francia e Reino Unido Windows Phone conseguiu acaparar o 10,8 e o 12% das vendas respectivamente, sendo a primeira vez que consegue chegar ás dúas cifras nestes mercados. Dende Kantar consideran que o crecemento de Windows Phone é consecuencia da comercialización dos terminais Lumia 520 e 620, que teñen moi boa acollida entre o público de entre 16 e 24 anos e de entre 35 e 49 anos (que son dos que máis buscan un equilibrio entre o prezo e as funcionalidades).
No escenario europeo Android continúa a amosar unha posición dominante, con 70,1% da cota de mercado, continuando en aumento (de feito, en España é moi superior, chegando ao 90,8%), mentres que BlackBerry está en extinción (nos cinco primeiros mercados europeos tería unha cota do 2,4% e no caso español de só 0,7%). Un detalle tamén destacable do dominio de Android é que depende principalmente de Samsung, fabricante que maior proveito saca do sistema operativo de Google tanto en Europa como no resto do mundo.
Mentres en España temos que a cota de mercado do iPhone durante o trimestre analizado é de só un 5,3% (detalle que podería explicar por que Apple non incluío o noso territorio no lanzamento do iPhone 5S e 5C), mentres que en EE.UU. consegue acaparar o 39,3% das vendas e en territorios como o Xapón teriamos que Android e Apple estarían practicamente empatados, deixando claro que hai moita diversidade ao longo do globo, aínda que en todos os mercados rexístrase un pulo cada vez maior de Android.