Edisa falará en Santiago da súa experiencia en mercados estranxeiros

Entre as empresas que van participar o vindeiro 24 de outubro na nova edición de GaliciaTIC atópase unha firma que leva ligada a esta xuntanza dende a súa primeira convocatoria (e xa son dez as edicións celebradas, unha cifra a ter moi en conta). Falamos de Edisa, cuxa participación no dito evento a celebrar en Santiago tense materializado tanto a nivel organizativo como a nivel expositivo: achegando relatorios na área do software de xestión empresarial e incorporando ao evento as últimas novidades neste eido.
No evento, engade Edisa, presentaranse as principais novidades, dende o punto de vista da oferta global, que sexan de interese para o sector empresarial e profesional. Como novidade nesta edición de GaliciaTIC farase énfase no I+D e na internacionalización das empresas. Edisa participará nunha das mesas redondas do congreso, en concreto a que xirará ao redor dos métodos e recursos para impulsar a busca de novos mercados, un ámbito no que Edisa amosará a súa experiencia (nos últimos anos abriu filiais en Colombia, México e República Dominicana, onde conseguiu importantes contratos). Segundo engade a empresa galega, con sedes principais en Ourense e Vigo, a xornada do 24 prevese completa, posto que se contará con relatores de primeira orde e primeiros directivos de empresas como Intel, Cisco, Oracle, IBM ou Indra, que incidirán sobre os temas de maior interese no panorama tecnolóxico.