O CPEIG organiza o día 8 un curso sobre comunicación oral da man do mago Íñigo Sáenz de Urturi

O Colexio Profesional de Enxeñaría en Informática de Galicia (CPEIG) vén de abrir o prazo de inscrición para asistir a unha actividade de seu sobre metodoloxías para expresarnos nunha contorna corporativa. Falamos dunha actividade que busca a meirande efectividade no menor tempo posible (son só dúas horas de contidos) e cuxo título non pode ser máis claro sobre os seus obxectivos: curso Expres-Arte. A sesión virá da man do mago e empresario Íñigo Sáenz de Urturi, e xirará arredor da comunicación intelixente na era dixital. A charla formativa terá lugar o vindeiro día 8 de novembro na Escola Galega de Administración Pública, en Santiago de Compostela, de 19.00 a 21.00 horas.
O CPEIG proponse, coa organización deste curso, promover a innovación en aspectos relacionados coa comunicación oral no eido empresarial mediante o fomento de competencias, habilidades e o coñecemento de metodoloxías complementarias que axudarán aos asistentes a coñecer o poder da palabra. Segundo o relator, “a interacción persoal, a comunicación oral, é vital e non se obvia, nin sequera se pode enmascarar a través dun e-mail, un tuit ou un SMS porque subxace. Por este e outros motivos, engade, “é transcendente realizala de xeito eficaz e intelixente para maximizar o tempo e os recursos”, apunta Sáenz de Urturi.
A cota de inscrición para asistir ao curso Expres-Arte é a seguinte: membros colexiados ou precolexiados, de balde; non colexiados e non precolexiados, 10 euros. Para inscribirse, cómpre cubrir o formulario de inscrición dispoñible no portal do CPEIG.
Lembrar que Íñigo Sáenz de Urturi é un experto en comunicación interpersoal. A súa carreira como mago profesional durante máis de 28 anos concédelle un alto grao de entendemento dos patróns da comunicación humana que, unido á súa experiencia en dirección comercial e xerencia da súa empresa, Be Magic S.L., conforman un perfil atractivo que xa lle valeu o alcume de O Mago da Comunicación.