Blogueiros, xornalistas e axentes turísticos participaron nunha quedada de promoción turística na Mariña de Lugo

Finalmente celebrouse a xuntanza (un famtrip pola nosa costa cantábrica) que avanzamos os días pasados con motivo de dar a coñecer as actividades de promoción turística que prepara a Mancomunidade de Concellos da Mariña de Lugo, no plano analóxico e no dixital, e coa axuda da empresa de Vilagarcía Tee Travel. A dita xuntanza-itinerario xuntou axentes de viaxes, operadores do sector e por suposto blogueiros ligados aos ámbitos turístico e gastronómico, todos eles estreitando ligazóns, compartindo obxectivos e vivindo (a pasada fin de semana) a experiencia de ser eles mesmos axentes e viaxeiros, comunicadores e turistas.
A cita desenvolveuse do 8 ao 10 de novembro, da man de Tee Travel e a Mancomunidade. Participaron, entre outros, Aser Álvarez, director de Comunicación da Asociación de Empresarios de Hostalaría de Santiago de Compostela e Comarca (e gañador do premio Mestre Mateo 2013), Xurxo Lobato, fotógrafo galego, e Jordi Ferrer, director, programador e webmaster do portal catalán de información de recursos turísticos de sendeirismo, Senderisme.com. Segundo nos contan dende Tee Travel, a viaxe comezou o venres día 8 de novembro en Ribadeo, e logo a ruta desenvolveuse facendo un treito do Camiño do Norte e pasando por Rinlo, a Praia das Catedrais (segunda de Europa e sexta mundial nos premios desenvolvidos a través da Internet Travellers”Choice Praias 2013), Mondoñedo, Foz, e a Pontenova.
Esta actividade insírese no acordo asinado entre a Mancomunidade de Municipios da Mariña e a empresa arousá Tee Travel co fin de potenciar o carácter diferencial da Mariña como destino turístico. O obxectivo é pór en valor os recursos da zona e difundilos naqueles mercados potenciais de interese. Entre as actividades concretas a realizar inclúese a dinamización e promoción turística da comarca de Lugo a través de campañas na Internet e nas redes sociais (Facebook ou Twitter), ou a organización de xuntanzas móbiles e itinerantes off line que dean acubillo a tódolos axentes implicados. Como por exemplo o famtrip que se desenvolveu do 8 ao 10 de novembro e reuniu axencias de viaxes, operadores, xornalistas e blogueiros da cousa turística.