Gmail permite descargar os adxuntos directamente en Google Drive

Google está a incorporar unha curiosa funcionalidade ao seu servizo de correo electrónico, contribuíndo á integración dos seus servizos, pois agora, cando accedamos a Gmail será posible evitar a descarga dos documentos adxuntos nos correos electrónicos ocupando o espazo de disco do noso equipo, optando por almacenalos directamente en Google Drive sen ter que abandonar Gmail, o que resulta especialmente práctico para usuarios que empregan múltiples dispositivos, de xeito que logo poden acceder a eses documentos dende o ordenador, o tablet ou o smartphone.
Ao abrir un correo electrónico, durante a previsualización de imaxes, vídeos, follas de cálculo e documentos PDF veremos nunha esquina como, aparte da opción de descarga, teremos tamén a icona de Google Drive, que facilitará a descarga de tal contido directamente no almacenamento na nube de Google.