O sector TIC e de contidos facturou máis de 91.000 millóns en 2012

Seguimos avanzando malia todo. Con isto queremos dicir basicamente que hai unha focha produtiva que nos afecta a todas e todos, pero que o sector das novas tecnoloxías da información, lonxe de ser dos máis afectados, tivo a súa achega de pulos cara adiante… aínda que tamén de freadas. Ou sexa, que o sector foi quen de xerar riqueza, pero tamén é certo que os seus índices son negativos nunha chea de parámetros. Así nolo certifica o Informe sobre o sector das TIC e os Contidos en España 2012 presentado esta semana polo Ministerio de Industria e desenvolvido polo Observatorio Nacional das Telecomunicacións e da Sociedade da Información (ONTSI). Segundo se fai saber neste novo estudo, a facturación das empresas do eido tecnolóxico-dixital e dos contidos superou os 91.000 millóns de euros o ano pasado.
Isto supón, con todo, un descenso do 8,7% na facturación do sector respecto ao ano anterior. No informe tamén se salienta a achega que fan as empresas do sector TIC á facturación total (84,1%), sendo as de servizos TIC as que fornecen o maior volume de cifra de negocio, cun 81,5% da facturación total. En canto ao número de empresas activas en ambos os sectores, apréciase un descenso do 13,7%, pasando de 28.727 empresas en 2010 a 24.779 en 2011. As empresas do sector TIC e os contidos supoñen o 2,3% do total das empresas do sector servizos. “Doutra banda”, sinalaron os responsables do estudo durante a presentación do mesmo, “durante o 2012 as empresas TIC e de contidos empregaron a 397.579 persoas, o que representa un descenso do 10,5% no número de persoas ocupadas con respecto ao ano anterior”.
As empresas do sector TIC son as que maior número de empregados achegan ao total, 319.477, fronte aos 78.102 empregados do sector dos contidos. Sobre o investimento, en 2012 alcanza os 15.638 millóns de euros, un 12,5% menos que en 2011. Os maiores investimentos realizáronas as empresas de actividades informáticas e os operadores de telecomunicacións, que acaparan máis do 70% dos investimentos de todo o sector. O valor engadido bruto a prezos de mercado foi de 53.860 millóns de euros en 2012, o que representa o 5,2% do Produto Interior Bruto nacional.