Femxa anuncia que vai contratar 200 persoas ao longo de 2014

O Grupo Femxa, do que falamos recentemente para dar conta do seu traballo a prol da formación TIC dos traballadores do mar, comeza ano dando boas novas. E tanto que son boas, xa que anuncia que vai contratar 200 persoas ao longo de 2014 para reforzar o seu papel de empresa referente a nivel estatal no eido da formación laboral baseada en novos recursos e tecnoloxías. A empresa, de raizame galega (ten sede principal en Vigo), duplicará deste xeito o número de novas incorporacións levadas a cabo durante o ano pasado. Polo tanto, pasará de ter 320 persoas na súa equipa ao peche de 2013 a contar con máis de cincocentos traballadores. Asemade, sinálanos a súa presidenta, a galega Patricia García, cómpre ter en conta que a compañía xera a día de hoxe ata douscentos empregos indirectos en empresas provedoras e máis de 500 postos anuais de persoal docente.
Esta política de Femxa semella especialmente salientable se temos en conta que van a contrapelo da tendencia xeral en España, tendencia que se resume en máis paro e máis xente nova que ten que liscar fóra. Cara a dar traballo aos profesionais novos, precisamente, é cara a onde se dirixe esta estratexia, que xorde de colaboracións co Servizo Público de Emprego Estatal e a Xunta de Galicia. De feito, para Femxa é fundamental este traballo conxunto entre empresas e administracións para pór freo á falta de expectativas laborais, que se están a cebar de xeito especial cos menores de trinta anos.
Polo que respecta ao tipo de traballos que se van ofrecer dende Femxa ao longo de 2014, dicir que oitenta e dous dos novos traballadores participarán no desenvolvemento de actividades internas de execución dos proxectos de formación contratados para este ano (que darán cobertura a máis de 25.000 alumnos). O resto, 118, dedicaranse ao desenvolvemento de novos contidos dixitais para reforzar a aposta pola aprendizaxe a distancia de Femxa como ferramenta formativa. “Estamos a realizar un investimento de máis de 2 millóns de euros co obxectivo de situarnos como empresa líder no fornecemento de formación oficial en liña”, engade García. Por certo que este ano a compañía mellorou os seus resultados respecto ao período anterior, “cun volume de negocio xestionado de 28 millóns de euros, participando en proxectos de formación en España e Latinoamérica nos que se implicaron máis de 20.000 alumnos”.