En marcha un novo plan para tirar partido das aulas CeMIT na alfabetización dixital de tódolos galegos

Presidencia, AMTEGA e a FEGAMP presentaron este mércores un proxecto conxunto para ampliar o alcance das actividades de alfabetización e capacitación que se desenvolve a través da rede de aulas CeMIT. Esta proposta conxunta, un Plan de Inclusión Dixital, supón o inicio da segunda fase da Rede de Centros para a Modernización e Inclusión Tecnolóxica (CeMIT), que arrancou en 2010 para fomentar o uso das novas tecnoloxías entre a sociedade galega, especialmente entre os colectivos máis afectados pola fenda dixital.
Agora, “tras tres anos de afianzamento da Rede cun total de 98 aulas integradas, presentes en 92 concellos e con máis de 32.200 usuarios rexistrados”, a Xunta busca garantir “a capilaridade destes servizos promovendo a participación dos axentes sociais, empresariais e entidades públicas para incrementar as actuacións en materia de inclusión dixital”, sinalaron Alfondo Rueda (Presidencia), Mar Pereira (Axencia para a Modernización Tecnolóxica de Galicia) e José Manuel Rey (Federación Galega de Municipios e Provincias) durante a sinatura do acordo entre as tres partes. “Nesta nova etapa da Rede CeMIT”, engadiron, “a FEGAMP xogará un papel fundamental como canle de comunicación cos concellos galegos e será a encargada de transferir a subvención aos municipios atendendo aos criterios de actividade establecidos no acordo e na difusión do Plan de Inclusión dixital a través da Rede CeMIT”.
Segundo se recolle no convenio, en 2014 a AMTEGA -a través da Federación galega de Municipios e Provincias- achegará aos concellos 768.272 euros euros para a realización de actividades en materia de alfabetización dixital. Desde este xoves 16, os concellos poderán solicitar o financiamento para actividades de formación nas aulas, que se distribuirá atendendo a criterios de actividade das aulas segundo o establecido no convenio. A esta cantidade súmase o investimento en equipamento e soporte técnico dos centros que ascende a máis de 911.000 euros . En total, este ano a AMTEGA destinará á formación dixital da Rede CeMIt máis de 1,6 millóns de euros. A Axencia para a Modernización Tecnolóxica será a encargada de elaborar no primeiro semestre de 2014 o Plan de Inclusión Dixital de Galicia. Xunto coa federación xestionará e coordinará as actividades definidas no Plan e impulsará a participación dos axentes sociais, entidades públicas e privadas en actuacións de inclusión dixital. O obxectivo final, fíxose saber, “é incrementar a oferta de formación dixital pública en condicións de igualdade para todos os galegos, con independencia da súa idade, lugar de residencia ou situación económica”.