Compostela estrea páxina web sobre desenvolvemento urbano e sustentable

Esta mañá a concelleira responsable de Desenvolvemento Urbano e Sostible do Concello de Santiago de Compostela, María Pardo, presentou a nova páxina web da súa área, que recolle toda a información relativa aos diferentes departamentos que aglutina “cunha vocación de transparencia, servizo, eficacia e achegamento ao cidadán”.
Este novo espazo web pretende ser unha ferramenta de información, difusión e participación cos cidadáns e outras entidades, agrupando nun único sitio os instrumentos, novas, tramitacións e informacións específicas da Área de Desenvolvemento Urbano e Sostible (Parques e Xardíns; Medio Ambiente e Sanidade; Medio Rural; Obras e Infraestruturas; Licenzas e Disciplina; Planeamento e Xestión; Cidade Histórica, Espazos Urbanos e Rehabilitación; e Cemiterios e Outros Servizos) aos que pode accederse dun xeito sinxelo, especialmente dende dispositivos móbiles.

Entre os aspectos os recursos que o visitante poderá atopar na nova páxina web, a concelleira destacou algúns como a súa propia axenda diaria, o acceso ao perfil do contratante, a consulta de toda a documentación relacionada cos proxectos previstos ou en marcha, o acceso a toda a información urbanística do Concello a través a aplicación de urbanismo en rede, a realización das xestións habituais que se seguirán incorporando á administración electrónica, a consulta das noticias e novidades máis destacadas, o acceso aos diferentes servizos ou a participación activa nas redes sociais. Ademais, incorporouse un acceso directo á Concellería para as asociacións de veciños, que poderán trasladar directamente as súas suxestións ou queixas. Nun futuro próximo, os propios veciños tamén terán a oportunidade de comunicar incidencias.