En marcha unha ferramenta para ver e denunciar a deforestación do noso planeta

Seguimos a dar conta de ferramentas informáticas que serven para garantir un mundo mellor, por moito que lles doa a certas empresas e gobernos. Falamos de recursos que tamén funcionan como observatorios de vixilancia ou comunidades de denuncia. Nesta liña é onde hai que situar Global Forest Watch, unha web lanzada por varios organismos mundiais que se serve dos mapas do Google para amosar un fenómeno tristemente imparable de non haber, precisamente, máis comunidade que lle poña freo. Falamos da deforestación do planeta, algo que podemos ver en Global Forest Watch en tempo real e que aos galegos sitúanos nunha posición dramática: achegamos xunto cos portugueses as áreas xeográficas máis aniquiladas da Península. Por que? Pois basicamente polo que acontece cada verán: lumes un día tras outro.
A ferramenta, de utilidade non só para cidadáns senón tamén para organizacións ecoloxistas e mesmo para empresas e gobernos que se comprometan valentemente co medio ambiente e a súa conservación (cousa que polo de agora é difícil de ver, sobre todo a nivel de gobernos), foi promovida polo World Resources Institute, que a presentou a semana pasada incidindo en que se trata só dunha parte integrante dun proxecto máis amplo, a faciana visible dunha iniciativa para impulsar a conservación dos medios naturais, arestora tan ameazados dende tódalas frontes e sen que a nosa terra sexa, nin moito menos, unha excepción. A ferramenta tira partido, como dixemos, dos mapas de Google e de informacións sobre o medio ambiente de entidades como Universidade de Maryland ou a NASA. A visualización dos datos corre a cargo da empresa española Vizzuality e a súa tecnoloxía CartoDB, tal e como nos contan dende eldiario.es, que reflicte opinións sobre os resultados do proxecto do propios implicados no seu desenvolvemento.