A oitava edición dos Premios EmprendedorXXI está dotada con máis de 400.000 euros en metálico

La Caixa vén de convocar unha nova edición dos seus Premios EmprendedorXXI, unha convocatoria (a oitava) que na nosa terra ten o apoio do Instituto Galego de Promoción Económica. A contía total a repartir nos diferentes premios é de 400.000 euros. Tamén haberá estadías de formación e traballo en rede en “algúns dos principais polos de innovación do mundo”, como por exemplo Cambridge (Reino Unido), Tel Aviv (Israel), Silicon Valley e Nova York (Estados Unidos). Os Premios EmprendedorXXI van dirixidos a emprendedores “que salienten por aplicar a innovación a aspectos fundamentais do seu negocio, polo seu potencial de crecemento e pola súa visión global”, informa La Caixas.
Poden presentar a súa candidatura as PEME e microPEME innovadoras con menos de dous anos no mercado (fundadas a partir de xaneiro de 2012). Estas empresas competirán na categoría Emprendes, que busca os proxectos de recente creación que destaquen especialmente polo potencial do modelo de negocio, polo tamaño e as características do seu mercado, o grao de innovación, o compromiso do equipo fundador e os resultados obtidos ata o momento.
As candidaturas achegaranse antes do vindeiro 10 de abril, exclusivamente en liña, na páxina web do certame. Durante os meses de maio e xuño, daranse a coñecer os 17 emprendedores seleccionados, un por comunidade autónoma, que pasarán a competir na fase estatal. O fallo final dos Premios EmprendedorXXI, na súa fase estatal, celebrarase en novembro. O acto reunirá aos gañadores autonómicos da categoría Emprendes, así como aos finalistas da modalidade Medras e aos premiados cos accésits outorgados por entidades colaboradoras.
Lembrar que nas diferentes edicións destes premios xa participaron un total de 3.190 empresas de nova creación. En total, La Caixa e ENISA destinaron 1,6 millóns de euros a achegas económicas para os gañadores e máis de 1 millón de euros a programas de formación e traballo en rede internacional.
Na edición de 2013, en Galicia participaron 29 empresas. Como fixemos saber daquela dende Código Cero resultou gañadora a iniciativa Qubitia Solutions, empresa que desenvolveu unha plataforma de software para producir e controlar, en tempo real, todo tipo de algoritmos e estratexias de investimento e cobertura para a contorna dos mercados. Dirixida aos profesionais dos mercados (brokers, xestores de entidades financeiras, etc.), facilita o estudo das súas estratexias de investimento nunha contorna cada vez máis complexo, con maior volume de datos e velocidade da información.