O espazo Lala!bandería lévanos da man á linguaxe informática aplicada no deseño web

Dun tempo a esta parte, a nosa terra está a acubillar interesantes propostas de traballo colaborativo abertas non só á innovación aplicada ás metodoloxías de traballo, senón tamén á creatividade en materia de servizos, produtos e disciplinas. Falamos de espazos do que se vén coñecendo como coworking e que teñen entre as súas vantaxes, precisamente, que ao seu respecto está todo por inventar. En Santiago está en activo un espazo destas características que semella encaixar ben na fórmula de innovación ante todo. Chámase Lala!bandería e trátase dun espazo de traballo compartido (a devandita metodoloxía do coworking) emprazado no barrio de Pontepedriña. A idea das súas responsables e manter vivo un espírito de colaboración permanente e, sobre todo, un proceso continuo de invención de dinámicas de traballo diferentes.
A proposta estase a presentar estes días a través dun inicio de tempada de primavera semella especialmente prolífico en actividades. Ou sexa, exposicións, cursos, obradoiros, charlas, todo de tipo de accións de carácter social e cultural, moitas delas en relación directa coa cuestión que nos ocupa, as novas tecnoloxías. Sen ir máis lonxe, a partir deste mes de abril, Daniel Bañobre Dopico (lala!bander especialista en seguridade informática e co-fundador da empresa Kunterbunt, amais de membro da iniciativa de deseño social Porcos Mortos), abrirá unha aula de introdución sobre linguaxe informática aplicado ao deseño web. O obxectivo: crear páxinas webs e personalizar o seu aspecto e funcionamento. Para inscribirse na aula, informan os lala!banders (así se fan chamar os membros e usuarios deste espazo de coworking e centro social), seranos preciso presentar previamente unha descrición do proxecto que se queira desenvolver.
O programa para este inicio de primavera complétase (entre outras cousas) cun curso sobre fotografía a cargo de David Barreiro (do venres 28 ao domingo 30 de marzo) e cun proxecto de recadación de apoios e mecenado na Rede (crowdfounding), a iniciativa Trala pegada dos Apartheids, na que tamén colabora Lala!bandería e que consiste en liñas xerais nunha mostra fotográfica e audiovisual a cargo da xornalista galega Iara M. Búa: diferentes anacos de vidas extraidos dos refuxiados de Palestina, Poissy (Francia) ou Manenberg (Suráfrica).