Trinta persoas comezan esta semana a súa andaina empresarial no viveiro do Molle

Este luns formalizáronse oficialmente os contratos para as sete empresas que van comezar os seus negocios nas instalacións do viveiro de Porto de Molle, unha iniciativa emprazada en Nigrán e impulsada polo Consorcio da Zona Franca de Vigo. En total, 29 persoas serán as primeiras en ocupar os espazos deste acubillo innovador, situado no segundo e o terceiro andar do Centro de Negocios. Alí terán ao alcance da man un “espazo axeitado para o comezo da súa andaina, amais de apoios de formación e asesoramento para que o seu negocio prospere”, informa a Zona Franca, que engade que estamos a falar de iniciativas do máis variado, pero sempre co nexo común do innovador e do tecnolóxico.
Máis polo miúdo, as súas actividades abranguen cuestións como a consultoría de telecomunicacións especializada en sistemas de predición de clima e de pragas para adegas e viñedos; servizos técnicos de enxeñaría e asesoramento en termos de produtividade e calidade; importación e exportación de mercadorías; servizos xurídicos en materia de urbanismo; servizos técnicos de arquitectura, urbanismo e enerxías renovables e o asesoramento a empresas do sector aeronáutico, naval, pesqueiro, de automoción, téxtil e farmacéutico en solucións tecnolóxicas e innovadoras.
Por certo que está previsto que en breve se asinen outro oito novos contratos a empresas emprendedoras. Lembrar que o consorcio puxo en marcha este viveiro mellorando o modelo que desde o ano 2003 xa ten en funcionamento no polígono da Granxa, no Porriño. Este novo viveiro terá “que facilitar a xestación de novas ideas e ser quen de identificar as novas oportunidades de mercado, axudar aos emprendedores para explotar esas oportunidades, pór en contacto aos emprendedores con proxectos institucionais ou doutros empresarios e difundir a cultura emprendedora no territorio para que aquí crense e consoliden novas empresas”, sinala a Zona Franca.