LastPass aproveita o sensor de pegadas dixitais do GALAXY S5 para identificarnos en distintos servizos en liña

Para ter unha correcta xestión de contrasinais moitos usuarios optan por empregar servizos de xestión dos mesmos, de xeito que só é preciso coñecer o contrasinal do servizo centralizado para poder acceder moitos outros servizos que poden empregar contrasinais moi complexos e incluso renovados con certa frecuencia, fornecendo a seguridade das nosas distintas contas de usuario en liña; e para facelo aínda máis doado no móbil dos servizos de xestión de contrasinais máis popular, LastPass, anunciou o soporte do sensor de pegadas dixitais do Samsung GALAXY S5, o que permitirá que os usuarios do servizo poidan identificarse en numerosas páxinas web e aplicacións con só pasar o seu dedo polo sensor biométrico do smartphone.
Para poder empregar LastPass no GALAXY S5 é preciso contar coa aplicación do servizo para Android, que aínda que pode descargarse libremente, só está dispoñible para usuarios Premium do servizo (que custa 1 dólar ao mes).
Esta nova aplicación supón un claro exemplo da vantaxe que supón que Samsung abra o seu sistema biométrico a terceiros (o que permite que tamén PayPal aproveite esta tecnoloxía para autorizar pagamentos), mentres que Apple restrinxe a tecnoloxía de Touch ID ao desbloqueo do terminais e á identificación nas súas tendas en liña.