Un curso da Universidade de Vigo abordará a optimización de aplicacións Java baixo Linux

O Centro de Investigación en Tecnoloxías da Información e das Comunicacións (CITIC) e Vitae Consultores están a colaborar coa Universidade de Vigo na organización dun curso sobre Optimización Avanzada de Apliacións Java en Servidores Linux que desenvolverase os días 27 e 28 de xuño durante 10 horas nas que o seu formador, Guillermo López Taboada, co fundador de Torus Software Solutions e con máis de 10 anos de experiencia na docencia universitaria, instruirá a profesionais en nocións avanzadas para optimizar as súas aplicacións Java de alto rendemento en servidores Linux, tanto dende un punto de vista do software como do hardware e dos elementos que os unen para conseguir altas prestacións nas aplicacións.
O curso estará orientado tanto a desenvolvedores como a enxeñeiros de rendemento e administradores de sistemas, con énfase na súa aplicación a proxectos Big Data en Java, completándose a formación cun caso de estudio de éxito de optimización avanzada. A docencia impartirase en español e a documentación achegarse en inglés.
Cómpre destacar que o nivel deste curso é moi avanzado, estando dirixido a unha elite de profesionais tanto do contorno de programación Java como de sistemas Linux que precisen optimizar aplicacións cun grande volume de transaccións de niveis críticos en rendemento.
Esta actividade ten límite de prazas e terá un custo de 240 euros por asistente, cota bonificable parcialmente pola Fundación Tripartita, estando xa aberta a súa inscrición ata o 24 de xuño.