Os galegos estamos á fronte do Estado en emprego de redes sociais

Os galegos somos os que máis usamos as redes sociais, aínda que logo isto non se reflicta nunha presenza significativa da nosa lingua. Segundo o máis recente informe elaborado polo Observatorio da Cultura Galega, o 83,2% dos internautas galegos empregamos Facebook, constituíndose a nosa comunidade (a galega) como a de meirande número de membros dentro do contexto estatal do devandito servizo 2.0. Algo semellante, aínda que non con tanta intensidade acontece coas redes sociais Twitter, Google+, LinkedIn, Instagram e Tuenti.
Segundo se detalla no dito informe do Observatorio, un departamento de seguimento e análise do Consello da Cultura Galega, os usos máis importantes que lles extraemos ás comunidades 2.0 son, por unha banda, a comunicación con amigos e familiares, e pola outra, a procura de información sobre cuestións de actualidade.
O informe Cultura e novas tecnoloxías que acaba de amosar o Observatorio e que temos na web do CCG dispoñible para consulta, avalía en detalle “dous aspectos fundamentais relacionados coa denominada Sociedade da Información e tamén coa irrupción de Internet na sociedade actual”, informan os responsables da súa elaboración.
Por unha banda, e tendo como referente a Encuesta sobre Equipamiento y Uso de Tecnologías de Información y Comunicación en los Hogares elaborada anualmente polo Instituto Nacional de Estadística, analízase a implicación dos fogares galegos nas novas tecnoloxías, así como a evolución e desenvolvemento destas dende a súa introdución na vida cotiá dos galegos.
Por outra, e a través da enquisa realizada pola Asociación para a Investigación de Medios de Comunicación (AIMC), afóndase nas novas relacións xurdidas entre os internautas galegos e a Rede.