Santiago acolle este xoves a terceira convocatoria do congreso de ecommerce CONECOM

Este xoves 19 de xuño celébrase no Pazo de Congresos de Santiago a terceira edición da Conferencia de Comercio Electrónico CONECOM, unha xuntanza de profesionais galegos e estatais que contará cun máis que completo programa de charlas e obradoiros formativos sobre os máis diversos temas tecnolóxicos, como por exemplo as actividades Innovar ou morrer, Loxística, Proxectos con éxito, Revender na Internet, Obradoiro de Prestashop ou Obradoiro de Newsletter.
Para as persoas interesadas en acudir a esta conferencia sobre mercadotecnia dixital e ecommerce, dicirlles que teñen toda a información relativa á mesma en conecom.es.
Por certo que este evento é case con toda probabilidade a máis importante (e a primeira) de cantas xuntanzas se celebran na nosa terra arredor da temática do comercio electrónico.
Ten por finalidade, segundo informan os organizadores (DobleClic), formar e dar as ferramentas de traballo ás PEME e ás novas iniciativas empresariais no ecommerce para así “crear un sector competitivo e fortalecer o tecido empresarial galego coa axuda das institucións e o esforzo de todos”.
Segundo engaden os impulsores da iniciativa, esta abrangue un amplo abano de nichos, sectores e temáticas, xa que a cuestión das vendas e as comunicacións por Internet e polas redes sociais é xa, a día de hoxe, unha cuestión universal que afecta a tódalas empresas. “Sectores como a artesanía, a agricultura, a industria e a cultura galega”, informan, “teñen un gran potencial de comercialización, pero en moitos casos non atopamos nin os recursos nin a iniciativa como para saber desenvolvelo e fortalecelo, baleiro que pretendemos cubrir con CONECOM, rompendo barreiras e instruíndo e capacitando aos emprendedores nas plataformas tecnolóxicas”.