O máis salientable da investigación tecnolóxica en eficiencia enerxética reúnese os vindeiros días na Toxa

Entre os días 25 e 26 de xuño toca falar, máis que nunca, e eficiencia enerxética e de métodos tecnolóxicos (ou non) para acadala nos nosos fogares e empresas. De feito, os devanditos días está previsto que se reúna na Illa da Toxa, no Grove (Pontevedra), boa parte dos meirandes especialistas internacionais nesta cuestión de sacar o máximo rendemento dos recursos enerxéticos ao tempo que somos quen de aforralos e consumilos de xeito racional, unha cuestión que visto o que acontece co planeta e coas enerxías tradicionais non renovables, vai ser a todas luces unha das grandes prioridades da tecnoloxía vindeira, senón a que máis.
Máis polo miúdo, participarán na sexta edición do Workshop Atlántico sobre Economía Enerxética e Ambiental expertos de 11 países de todo o mundo, presentando os resultados máis relevantes das súas últimas investigacións ao tempo que amosan tecnoloxías e casos concretos para impulsar a rendibilidade e a eficiencia vinculadas á enerxía. O evento, organizado polo centro de investigación galego Economics for Energy e o Centro para a Investigación Económica Europea (ZEW, con sede en Alemaña), é un acontecemento bienal que chega á súa sexta edición consolidado como referente a nivel mundial. Durante o congreso, presentarase a primeira plataforma europea de investigación no ámbito da economía da eficiencia enerxética, promovida por estes dous centros de investigación máis o Instituto Federal de Tecnoloxía de Zürich (ETH Zürich, en Suíza) e a Fundación Eni Enrico Mattei (FEEM), en Italia.
A coordinación da organización do congreso corresponde -un ano máis- ao investigador galego Xavier Labandeira, director de Economics for Energy e que en setembro asumirá a dirección da Unidade de Investigación sobre Política Climática (CPRU) do European University Institute, “un dos centros de referencia para a Comisión Europea nesta materia”, informan os impulsores do evento. Neste, xa nun plano máis concreto, desenvolveranse relatorios científicos a cargo de expertos chegados de Alemaña, Italia, Francia, Suíza, Reino Unido, Portugal, Australia, Xapón, Estados Unidos, Chile, ademais de España. Os relatores principais, informa a organización, serán Richard Schmalensee e Massimo Filippini. O primeiro abordará o futuro da enerxía solar. É profesor do Instituto Tecnolóxico de Massachusetts (MIT), onde dirixiu o seu Centro de Investigación de Políticas Enerxéticas e Ambientais. Pola súa banda, Filippini é director do Centro de Política e Economía da Enerxía do Instituto Federal de Tecnoloxía de Zürich (ETH Zürich, considerado o MIT europeo) e membro do Centro de Investigación Económica dependente do mesmo organismo. A súa intervención versará sobre a eficiencia enerxética no sector residencial.
En total, durante o congreso realizaranse 45 relatorios, entre sesións plenarias e paralelas, ás que se sumará unha mesa redonda sobre as fronteiras da economía da eficiencia enerxética na que debaterán expertos procedentes de centros europeos, estadounidenses e xaponeses para obter unha perspectiva mundial.