HP refórzase como un dos provedores TIC con máis presenza en Galicia

HP foi e segue a ser un dos grandes provedores tecnolóxicos da nosa terra. Boa parte desta actividade non é visible de boas a primeiras para a cidadanía galega, malia a importancia das tarefas que se contribúen a resolver. Tarefas, insistimos, de índole crucial para mellorar a nosa calidade de vida. Un exemplo disto é a longa colaboración amosada por HP e o Centro de Supercomputación de Galicia (CESGA), un traballo conxunto orientado a xuntar forzas e recursos para levar a cabo complexos labores de cómputo. Segundo informa HP, esta vertente (a de pór en xogo novas capacidades tecnolóxicas para resolver tarefas xigantescas) é a nova fronteira da innovación, a competencia e a produtividade.
En liñas xerais e ao fío da devandita fronteira, do que se trata é de sermos quen de analizar a gran cantidade de millóns de datos que se xeran dende un ámbito concreto da investigación “para transformalos en información útil para a sociedade e en tempo real”, explican fontes de HP. Esta nova capacidade de análise, engade a multinacional, confire unha oportunidade de inventar e investigar novos métodos e algoritmos capaces de detectar configuracións ou correlacións útiles presentes en grandes volumes de datos. Segundo engade a compañía, a nosa terra está plenamente inserida neste proceso da man (precisamente) de HP. Un proceso que, por outra banda, está cada vez máis democratizado, como demostra o feito de que a compañía veña de lanzar recentemente diferentes exemplos de supercomputadores de índole comercial a través da gama HP Apollo, unha manobra que, en palabras da empresa, “diríxese a converter os esforzos de investigación e desenvolvemento nunha vantaxe competitiva”. De feito e para facérmonos unha idea do que abrolla da familia Apollo de sistemas HPC, dicir que os equipos da gama son quen de transformar ata catro veces o rendemento dos servidores estándar de rack usando menos espazo e enerxía de computación de alto rendemento.
HP como provedor tecnolóxico
Como dixemos, a filosofía de Hewlett Packard baséase en boa medida en xuntar forzas cos investigadores e cos centros de I+D para achegar recursos de seu e abordar novos xeitos e novas respostas no manexo de grandes volumes de datos. De aí xorde o traballo despregado con entidades como o Centro de Supercomputación Galicia (CESGA) ou os centros de tecnolóxicos e de investigación das universidades, por exemplo o CiTIUS no caso da Universidade de Santiago. HP tamén salienta o labor das áreas de investigación tecnolóxica da Universidade da Coruña e a Universidade de Vigo, do operador público Retegal e de institutos tecnolóxicos como Gradiant. Este tecido de impulsores e renovadores da I+D comparte unha necesidade común: a de extraer o útil, o miolo (configuracións, correlacións) da análise de grandes volumes de coñecemento.
A xuízo de HP, está claro que “avaliar máis información en menos tempo pode axudar a tomar mellores e máis rápidas decisións en sectores como o financeiro, a saúde e a investigación, con todos os beneficios e vantaxes que todo iso implica para a sociedade da nosa contorna”. Segundo informa a multinacional, esta tense apoiado e ten colaborado cos devanditos centros en diversas iniciativas, como de formación e investigación, “e entre todos eles fomos quen de atopar claros exemplos de axuda ao desenvolvemento da nosa sociedade en diferentes áreas”. Por exemplo o proxecto CENTINEL, no que colaboran o CESGA e Gradiant, entre outros, e que se encamiña a dotar de intelixencia aos edificios; ou o proxecto que Gradiant ten entre mans para o procesamento de datos xenéticos destinado a detectar, previr e tratar as doenzas raras (un proxecto do que falamos recentemente en Código Cero); ou tamén CloudPEME, onde o CESGA contribúe a incrementar o potencial competitivo das nosas empresas a través da innovación baseada en ferramentas TIC e cloud.

Asemade, HP tamén salienta o valor e a utilidade “dunha interesante plataforma cuxa finalidade principal é o acceso a xeodatos arqueolóxicos da Idade de Ferro do noroeste ibérico”, unha plataforma que tamén reflectimos recentemente dende Código Cero, destacando que vén da man do Grupo de Estudos de Prehistoria do Noroeste (GEPN) da Universidade de Santiago e o CESGA, e que se vai presentar o vindeiro 30 de xuño.
Por outra banda, a nivel empresarial Hewlett Packard destaca iniciativas acabadas de xurdir do ámbito TIC e con claro potencial de proxección, é o caso da spin-off da Facultade de Informática da Universidade da Coruña, Torus Software Solutions, adicada a materializar solucións de software de comunicacións ultrarrápido que permiten acelerar aplicacións en contornas onde o rendemento é crítico. HP tamén salienta a imparable carreira de éxitos e recoñecementos de Torus.
Sinalar por último que amais da tecnoloxía e a colaboración de HP nestes centros, a multinacional conta tamén cun gran número de profesionais TIC en Galicia traballando e colaborando con organismos de Xunta de Galicia, para facer máis eficiente, por exemplo, o servizo sanitario galego (co seu centro de Business Inteligent en Santiago) ou parte do tecido e actividade administrativa na Consellería de Presidencia.