O CPETIG convoca un concurso de aplicacións para promover a creatividade nos colexios galegos

O Colexio Profesional de Enxeñaría Técnica en Informática de Galicia (CPETIG) vén de convocar aos centros de ensinanza obrigatoria de Galicia a participar no concurso de deseño de aplicacións informáticas coa ferramenta Scratch co obxectivo de “promover unha aprendizaxe de xeito creativo, o razoamento sistemático e o traballo cooperativo coa comunidade entre as xeracións máis novas”. Segundo informa a entidade profesional, durante o curso escolar os alumnos en colaboración cos seus profesores de Tecnoloxía e de Informática “poderán deseñar historias interactivas, xogos e animacións”. Os traballos que se presenten serán avaliados por un xurado encargado de distinguir ás mellores ideas.
O concurso de deseño de aplicacións informáticas do CPETIG conta coa colaboración da AMTEGA e da Consellería de Consellería de Cultura, Educación e Ordenación Universitaria e o apoio da Fundación Barrié de la Maza, Coremain, El Corte Inglés, Gadis e a asociación Programamos.
Segundo se engade dende o colexio, esta iniciativa dálle continuidade aos esforzos que se impulsan dende o CPETIG para fomentar as ensinanzas de programación informática, promover a formación de tecnoloxía informática nas aulas, difundir a importancia da informática no desenvolvemento sustentable da Sociedade da Información e mellorar a confianza da sociedade nas ferramentas informáticas
Ao fío do devandito, o CPETIG lembra que o o pasado mes de abril un curso de formación de desenvolvemento de aplicacións informáticas coa ferramenta Scratch no que participaron máis de 35 profesores non universitarias de Tecnoloxía e Informática de toda Galicia, que foi impartido polos profesores Jesús Moreno León e José Ignacio Huertas Fernández, que contan con máis de 10 anos de experiencia neste eido.